قصيدة الى امي الحنونة

عصّابتها ليل . وضيمها النجمات =
وتلولي عله الكمر وبصوتهه تدفعه
وظهرها المنحني رکعه عله طول اليوم=
يعني عله الارض من تمشي جن ركعه
لبّسها الزمن محبس العوز سنين =
كلف طيّح إصبعها ورفضت تخلعه
وصينية شمع بجفونها والله =
بس ترمش بخدهه تطيح الف شمعه
كبل طلاّب جنه تزتنه من نروح =
حد باب الدروس وترجع القلعه
ترجع تحجي بينه وخاف مو شطّار =
وبكلب الصفوف صياحنه تسمعه
وتتمنانه نكبر والحمل ينشال =
ونطفي الجرح ونسكت الدمعه
وتتنومس باسمنه وتبني تل أحلام =
وتخاف الحرب بنيانها تشلعه
وتدعي انشا الله ياربي دوم ازغار =
مانكبر بعد واليكبر ترجعه
ونطلع نلكه دمعتهه بهذاك الصوب =
وصدى حسهه بسياج المدرسه ينعه
ومانفهم قضية ضحكة الدمعات =
المهم عدنه طلعنه وباجر الجمعه
وتفتر السنين وتنحني الايام =
لامي وينحني ظهر امي من تنعه
من تنعه الحزن ينسى الحزن وينام =
وتكعده وتعلمه الحزن وترضعه
وكبرت وانحنت بس بقت نفس الطول =
ذهب وشما عتك ماتعتك اللمعه
وصح ينزل دمعهه سيوف عالوجنات =
بس بسيوف خدهه الباشطه تكطعه
ويمر بيها الفرح ويدك عليهه الباب =
تفتحله بحزنهه وتطلع تودعه
رادت مره تضحك بالهجوم الفات =
كالت بلكي ثوب دموعهه تنزعه
ومر صوت الهجوم يفزز الدمعات =
زعلت وي فرحهه وكسّرت ضلعه
ونزف صدر الوطن من كثرن الجيلات =
صارتله درع وتلكت الفزعه
خاطر من يطيح وترض صدره الخيل =
أول مايموت من الوطن درعه
أول مايموت من الوطن درعه